З нагоды Міжнароднага дня роднай мовы 19 лютага ў школе прайшло Свята роднай мовы.У гэты дзень да беларускасці дакрануўся кожны. Напярэдадні вучні ўдзельнічалі ў конкурсе відэаролікаў, у якіх здымалі свае любімыя вершы, наладзілі выставу даматканых і вышываных ручнікоў “Ручнікі – повязь часоў”.Таксама вучням і настаўнікам загадзя было прапанавана прынесці свае любімыя вершы ў друкаваным варыянце, з якіх была наладжана выстава “Нашы любімыя вершы”. Раніцай вучняў і наведвальнікаў школы сустракалі настаўніца беларускай мовы і дзяўчаты ў беларускіх строях, якія нагадвалі аб свяце і прасілі напісаць свае любімыя беларускія словы, з якіх потым і была наладжана выстава “Нашы любімыя беларускія словы”. Як высветлілася, любімае беларускае слова ў нашай школе - Радзіма!
Далей свята было арганізавана такім чынам, што на ўсіх перапынках на першым паверсе дэманстраваўся відэаматэрыял: ролікі чытачоў, на якіх шмат хто з вучняў мог спазнаць сябе і сваіх сяброў, музычныя сучасныя кліпы на беларускамоўныя песні, беларускамоўны мультматэрыял. На другім паверсе арганізатары свята праводзілі інтэрактыў “Скарбонка роднай мовы”, які выклікаў цікавасць і ў вучняў, і ў настаўнікаў нашай школы. Завяршыла свята інтэлектуальная гульня “Размаўляем па-беларуску!” , у якой спаборнічалі вучні старэйшых класаў і настаўнікі. З перавагай у тры балы перамагла каманда настаўнікаў! Свята атрымалася! Яно было не толькі вясёлым і шумным, але і вельмі карысным!